Liderët arabë mbërrijnë në Egjipt për samitin urgjent arab mbi Gazën

Liderët arabë kanë filluar të mbërrijnë në Egjipt për të marrë pjesë në një samit urgjent arab mbi Rripin e Gazës së shkatërruar nga lufta, transmeton Anadolu.

Agjencia shtetërore irakiane e lajmeve INA raportoi se presidenti Abul Latif Rashid mbërriti në kryeqytetin egjiptian Kajro për të marrë pjesë në samitin e ditës së nesërme për të diskutuar zhvillimet në Gaza dhe Bregun Perëndimor.

Mbreti i Bahreinit, Hamad bin Isa Al-Khalifa, sipas agjencisë së lajmeve të Bahreinit BNA, gjithashtu sot do të niset nga Manama për në Kajro për të marrë pjesë në samit.

Princi i Kurorës së Kuvajtit, Sabah Al-Khaled Al-Sabah, sipas agjencisë shtetërore të lajmeve KANA, do të fluturojë nesër për në Kajro për të kryesuar delegacionin e vendit të tij në samit.

Presidenti sirian, Ahmed al-Sharaa, gjithashtu pritet të kryesojë delegacionin e Sirisë në samitin arab.

Ministri sirian i Punëve të Jashtme, Asaad al-Shaibani, mbërriti në Kajro sot për të marrë pjesë në takimet përgatitore për samitin.

Delegacioni i Tunizisë në samit do të kryesohet nga ministri i Punëve të Jashtme, Ali Nafti.

Samiti arab i nesërm synon të formulojë një qëndrim të unifikuar arab për çështjen palestineze dhe të paraqesë një kundër-propozim arab ndaj planeve të SHBA-së për zhvendosjen e popullsisë së Gazës.

Muajin e kaluar, presidenti i SHBA-së, Donald Trump, propozoi “të marrë përsipër” Gazën dhe të zhvendosë popullsinë e saj për ta kthyer enklavën në një destinacion turistik, një ide e refuzuar fuqishëm nga bota arabe dhe shumë vende të tjera, të cilët thonë se kjo përbën spastrim etnik.

Të paktën 48.300 palestinezë janë vrarë, kryesisht gra dhe fëmijë, si dhe mbi 111 mijë të tjerë janë plagosur në luftën brutale izraelite në Gaza që nga tetori i vitit 2023. Sulmet izraelite, që e kanë lënë enklavën në gërmadha, u ndërprenë në bazë të një marrëveshje armëpushimi dhe shkëmbimi të të burgosurve që hyri në fuqi më 19 janar.

Megjithatë, Izraeli dje ndaloi hyrjen e ndihmave humanitare në Gaza, disa orë pas skadimit të fazës së parë të marrëveshjes së armëpushimit.

Nëntorin e vitit të kaluar, Gjykata Penale Ndërkombëtare lëshoi urdhër-arreste ndaj kryeministrit izraelit, Benjamin Netanyahu dhe ish-ministrit të Mbrojtjes, Yoav Gallant, duke i akuzuar për krime lufte dhe krime kundër njerëzimit.

Izraelit për luftën në enklavën palestineze gjithashtu përballet me një çështje gjenocidi në Gjykatën Ndërkombëtare të Drejtësisë.