Sipas një raporti nga Këshilli për Marrëdhëniet Amerikano-Islamike (CAIR), ankesat kundër muslimanëve arritën një rekord kulmor në SHBA në vitin 2023, transmeton Anadolu.
Grupi i të drejtave civile muslimane tha se mori 8.016 ankesa në mbarë vendin vitin e kaluar, duke shënuar numrin më të lartë që ka regjistruar grupi në historinë e tij 30-vjeçare.
“Ne kemi marrë 3.578 nga ato ankesa ndërmjet 1 tetorit dhe 31 dhjetorit. Me fjalë të tjera, gati gjysma e të gjitha ankesave të marra në vitin 2023 janë raportuar në tre muajt e fundit të vitit”, thuhet në raport.
Ajo periudhë u shënua nga një përshkallëzim i armiqësive nga Izraeli në Rripin e Gazës pas një sulmi të 7 tetorit nga grupi i rezistencës palestinez Hamas kundër Izraelit jugor.
“Forca kryesore pas kësaj vale islamofobie të shtuar ishte përshkallëzimi i dhunës në Izrael dhe Palestinë në tetor të vitit 2023”, tha CAIR.
Vala e incidenteve anti-muslimane të vitit 2023, një rritje prej 56 për qind krahasuar me një vit më parë, tejkaloi periudhën pas zbatimit të ndalimit të muslimanëve nga ish-presidenti Donald Trump në vitin 2017, e cila pa një rritje prej 32 për qind krahasuar me një vit më parë.
Raporti po ashtu tha se numri më i lartë i regjistruar i ankesave ka ndodhur më parë në vitin 2021, por numri i ankesave në vitin 2023 shënon një rritje prej 20 për qind, respektivisht nga 6.720 ankesa të raportuara në vitin 2021.
“Me 1.637 ankesa, rastet e emigracionit dhe azilit përbënin 20 për qind të ankesave totale të pranuara në vitin 2023. Diskriminimi në punë 1.201 ankesa ose 15 për qind, diskriminimi në arsim 688 ankesa ose 8,5 për qind, si dhe krimet dhe incidentet e urrejtjes 607 ankesa ose 7.5 për qind janë ndër kategoritë më të raportuara”, thuhet në raport.
Të paktën 32.800 palestinezë janë vrarë dhe mbi 75.300 të tjerë janë plagosur në mes të shkatërrimit në masë dhe mungesës së nevojave që kur Izraeli filloi sulmin kundër Gazës.
Izraeli gjithashtu ka vendosur një bllokadë gjymtuese ndaj Gazës, duke e lënë në prag të urisë popullsinë e saj, veçanërisht banorët e pjesës veriore të enklavës.
Sipas Kombeve të Bashkuara (OKB), lufta izraelite ka çuar në zhvendosjen e brendshme të 85 për qind të popullsisë së Gazës mes mungesës akute të ushqimit, ujit të pastër dhe ilaçeve. Po ashtu 60 për qind e infrastrukturës së enklavës është dëmtuar ose shkatërruese.
Izraeli akuzohet për gjenocid në Gjykatën Ndërkombëtare të Drejtësisë, e cila javën e kaluar i kërkoi Tel Avivit të bëjë më shumë për të parandaluar urinë në Gaza.
