Drejtoresha ekzekutive e UNICEF-it, Catherine Russell, kërkoi “t’i jepet fund vrasjes së pakuptimtë të fëmijëve” pas sulmit ajror izraelit mbi tendat që strehonin njerëzit e zhvendosur në Rafah, raporton Anadolu.
“Imazhet e fëmijëve të djegur dhe familjeve që dalin nga tendat e bombarduara në Rafah na tronditin të gjithëve. Vrasja e raportuar e fëmijëve të strehuar në tenda të improvizuara është e pandërgjegjshme”, shkroi Russell në X.
Duke nënvizuar ashpërsinë e situatës, Russell tha: “Për më shumë se 7 muaj, ne kemi qenë dëshmitarë të shpalosjes së kësaj tragjedie, duke rezultuar në mijëra fëmijë të vrarë ose të plagosur”.
Ajo më tej bëri thirrje për “një armëpushim të menjëhershëm, lirimin e pakushtëzuar të të gjithë pengjeve dhe fundin e vrasjes së pakuptimtë të fëmijëve”.
Sipas të dhënave të fundit, të paktën 45 persona u vranë dhe dhjetëra u plagosën pasi Izraeli dje shënjestroi një kamp për personat e zhvendosur dhe shtëpitë në Rafah, thanë burime mjekësore.
Sulmi ndodhi pranë bazës logjistike të agjencisë së OKB-së për refugjatët palestinezë (UNRWA) në Tal al-Sultan, njoftoi Zyra e Medias në Gaza.
Avioni izraelit shënjestroi disa tenda në zonë, tha zyra e mediave, duke shtuar se janë përdorur raketa dhe bomba 2000 paund.
Më herët, mbrojtja civile e Gazës tha se transportoi 50 persona, përfshirë të vdekur dhe të plagosur, pas bombardimeve. Në zonën e shënjestruar strehohen të paktën 100 mijë njerëz të zhvendosur.
Izraeli ka vrarë më shumë se 36 mijë palestinezë në Rripin e Gazës që nga sulmi ndërkufitar nga Hamasi më 7 tetor të vitit të kaluar.
Fushata ushtarake e ka kthyer pjesën më të madhe të enklavës me 2.3 milionë njerëz në gërmadha, duke lënë shumicën e civilëve të pastrehë dhe në rrezik nga uria.
Sulmet izraelite vazhdojnë pavarësisht vendimit të Gjykatës Ndërkombëtare të Drejtësisë që urdhëroi Izraelin të ndalonte ofensivën e tij në Rafah, ku mbi një milion palestinezë kishin kërkuar strehim nga lufta përpara se të pushtohej më 6 maj.
