Prokuroria Shtetërore e Qarkut të Zagrebit ka njoftuar se ekspertiza balistike e fragmenteve metalike të dronit ushtarak që u rrëzua në Zagreb përcaktoi se ishte një avio-bombë me ndezës, ndërsa për gjurmët e eksplozivit ende nuk kanë nxjerr një përfundim, transmeton Anadolu Agency (AA).
Nisur nga informacionet e publikuara në media për rezultatet e ekspertizës, si dhe nga pyetjet e marra nga gazetarët, Prokuroria e Qarkut të Zagrebit raportoi se “për të analizuar gjurmët e sekuestruara në vendngjarje deri më tani janë lëshuar urdhra për kryerjen e disa llojeve të ekspertizave dhe është kërkuar mendimi i ekspertit të profesionit teknik aeronautik”.
Deri më tani, Prokuroria Shtetërore e Qarkut të Zagrebit ka marrë rezultatet e ekspertizës balistike dhe vetëm një pjesë të rezultateve të ekspertizës kimiko-fizike dhe zyra njoftoi se ekspertiza balistike e fragmenteve metalike përcaktoi se ishte një avio-bombë me ndezës.
“Rezultatet e deritanishme të hetimeve penale dhe rezultatet e një pjese të ekspertizës së kryer nuk japin bazë për të arritur rezultatin përfundimtar”, thuhet në deklaratë.
Prokuroria e Shtetit të Zagrebit në koordinim me organet kompetente të përfshira në hetimin penal vazhdon punën në lëndën për të përcaktuar të gjitha rrethanat relevante të rrëzimit të dronit TU-141 Strizh në qarkun Jarun të Zagrebit rreth dy javë më parë.