Ankara
I dërguari i posaçëm i Kombeve të Bashkuara (OKB) për Sirinë, Geir Pedersen, vlerësoi përpjekjet e Turqisë në strehimin e refugjatëve sirianë, raporton Anadolu Agency (AA).
Në një konferencë virtuale për media, Geir Pedersen përsëriti thirrjen e tij për një armëpushim mbarëkombëtar në Siri dhe tha se situata në Idlib ka qenë “relativisht e qetë” për më shumë se një vit.
Duke iu përgjigjur pyetjes mbi mbështetjen e mundshme ndërkombëtare për Turqinë në strehimin e refugjatëve sirianë, Pedersen përshëndeti përpjekjet e vendit.
“Ne të gjithë e vlerësojmë dhe e kuptojmë rëndësinë e Turqisë kur bëhet fjalë për strehimin e refugjatëve Sirianë dhe unë e di se familja e OKB-së ka shprehur vlerësimin e saj për Turqinë për atë që po bën”, tha ai.
Pedersen tha se në fund të këtij muaji, do të ketë një konferencë mbi ndihmën humanitare për Sirinë në Bruksel, duke shtuar se në këtë konferencë do të diskutohet ndihma për refugjatët në Turqi.
Siria ka qenë e përfshirë në një luftë civile që nga fillimi i vitit 2011, kur regjimi i Bashar al-Assad-it goditi protestat pro-demokratike me një egërsi të papritur.
Sipas zyrtarëve të OKB-së, gjatë 10 viteve të fundit qindra mijëra njerëz janë vrarë dhe më shumë se 10 milionë janë zhvendosur.