Forca Paqeruajtëse e NATO-s në Kosovë (KFOR) vazhdon të ofrojë siguri në Kosovë me patrullimet e saj tokësore dhe ajrore pas tensioneve në veri të Kosovës në javët e fundit, raporton Anadolu.
Në kuadër një turneu mediatik të organizuar nga KFOR-i, gazetarët vëzhguan aktivitete të patrullimit të kryer nga ushtarët e Zvicrës dhe Kroacisë me helikopter dhe ushtarët italianë nga toka, si dhe kapacitetin e kësaj force për të ndërhyrë në një tension të mundshëm në vend.
Gazetarët janë bërë dëshmitarë se KFOR-i, me rreth 4 mijë e 500 ushtarë nga 27 vende, është i gatshëm t’i përgjigjet shpejt një tensioni të mundshëm.
Pas tensioneve të fundit në Kosovë, Batalioni i Komandës së Brigadës 65 të Mekanizuar të Këmbësorisë, i cili ishte dislokuar në Kosovë si “njësi vigjilence” me kërkesë të NATO-s, në kuadër të turit mediatik ka dhënë një deklaratë për gazetarët.
Komandanti i këtij batalioni, Fatih Perk, tha se për këtë detyrë krahas aktiviteteve të tyre shtëpiake janë përgatitur prej rreth 3 vitesh.
“Detyra jonë këtu është që të kryejmë aktivitetet tona në drejtim të sigurimit të paqes dhe qetësisë në rajon duke i trajtuar të gjitha palët dhe elementët në mënyrë të barabartë”, tha Perk.
David Anglese, komandanti i njësisë italiane, i cili më 29 maj shërbeu në tensionet që ndodhën në veri të Kosovës në Zveçan dhe rezultuan me plagosjen e 30 ushtarëve të KFOR-it, deklaroi se falë përkushtimit të ushtarëve të KFOR-it ata arritën të parandalonin një situatë që mund të çonte në përplasje shumë më të rënda.
