Kosovë, presidentja Osmani i kërkon qeverisë të pezullojë tarifat e importit ndaj produkteve amerikane

Presidentja e Kosovës, Vjosa Osmani, i ka kërkuar qeverisë së vendit që t’i pezullojë tarifat e importit ndaj të gjitha mallrave amerikane, një ditë pasi homologu i saj Donald Trump nënshkroi urdhër për tarifa reciproke ndaj vendeve në mbarë botën, transmeton Anadolu.

“Sot, zyrtarisht i kërkova Qeverisë së Kosovës që të pezullojë tarifat e importit për të gjitha produktet amerikane”, ka shkruar Osmani në rrjetet sociale.

Ajo e ka cilësuar këtë si “një hap i rëndësishëm për të thelluar lidhjet ekonomike me aleatin tonë më të ngushtë dhe për të dërguar një mesazh të qartë: Kosova është e gatshme për një marrëdhënie më të fuqishme me Shtetet e Bashkuara, me një vizion të qartë që do t’i bënte të dyja vendet tona më të forta, më të sigurta dhe më të begata”.

Ajo është shprehur e bindur se kjo lëvizje do të hapë mundësi të reja për krijimin e vendeve të punës, shkëmbimin e teknologjisë dhe rritjen ekonomike afatgjatë.

“Më shumë se një lëvizje ekonomike, ky është një objektiv i politikës së jashtme, duke riafirmuar përkushtimin tonë të qëndrueshëm ndaj aleancës Kosovë-SHBA, e ndërtuar mbi vlerat e përbashkëta të lirisë dhe dekada të mbështetjes së palëkundur”, ka theksuar Osmani.

Ndryshe, sipas urdhrit të ri të nënshkruar nga Trump, një tarifë minimale bazë prej 10 për qind do të vendoset për të gjitha vendet, me shuma më të larta të ngarkuara për vendet që Trump i ka konsideruar si shkelësit “më të këqij” tregtarë.

Presidenti amerikan tha se përpjekja e tij e re ekonomike synon të ndihmojë në ndërtimin e ekonomisë amerikane dhe “të parandalojë mashtrimin”.