Maqedonia e Veriut dhe Kosova “së shpejti” më kalim të përbashkët kufitar
Zv/kryeministri i Maqedonisë së Veriut, Izet Mexhiti, së bashku me ministrin e Punëve të Brendshme, Pancë Toshkovski, dhe ministrin e Punëve të Brendshme të Kosovës, Xhelal Sveçla, kanë vizituar pikën kufitare Bllacë për të shqyrtuar përparimin e përgatitjeve për zbatimin e sistemit me një kalim të përbashkët kufitar, transmeton Anadolu.
Sipas autoriteteve të Maqedonisë së Veriut, pritet që “së shpejti” të nisë zbatimi i këtij sistemi të kalimit të përbashkët kufitar, të njohur si “One Stop Shop”.
Sipas zyrës për media të zv/kryeministrit Mexhiti, ky sistem që pritet të lëshohet së shpejti në përdorim, do të thjeshtojë procedurat kufitare, duke reduktuar kohën e pritjes dhe lehtësuar lëvizjen e qytetarëve.
Mexhiti e cilësoi këtë si një hap të rëndësishëm në forcimin e marrëdhënieve mes dy vendeve dhe në përmirësimin e përvojës së qytetarëve gjatë kalimit të kufirit.
“Nga ky bashkëpunim përfitojnë drejtpërdrejt qytetarët tanë, veçanërisht shqiptarët e Kosovës dhe Maqedonisë së Veriut, të cilët janë të lidhur ngushtësisht në nivel kulturor, gjuhësor dhe familjar”, tha Mexhiti.
Ai shtoi se kjo është një arritje e përbashkët e qeverive të Maqedonisë së Veriut dhe Kosovës, e rënë dakord në takimin e fundit ndërqeveritar në Prishtinë, e cila, sipas tij, do të ketë ndikim të drejtpërdrejtë në jetën e qytetarëve dhe në forcimin e bashkëpunimit rajonal.
Ministri Toshkovski, nga ana e tij, tha se gjatë vizitës konstatuan se të gjitha pajisjet nga aspekti teknik që duhet të zbatohen dhe instalohen janë në fazën e instalimit. Ai tha se po fillohen përgatitjet për rrjetëzimin e dy sistemeve.
