Karvani i parë i haxhilerëve nga Rripi i Gazës u nis për në tokën e shenjtë në Arabinë Saudite, transmeton Anadolu.
Në një deklaratë me shkrim të Ministrisë së Brendshme dhe Sigurisë Kombëtare në Gaza, thuhet se autokolona e parë e Haxhit ka kaluar në mëngjes nga porta kufitare Rafah drejt Egjiptit dhe prej atje do të niset për në Arabinë Saudite.
Në deklaratë thuhet se deri më tani nga Gaza janë larguar 900 haxhilerë të ardhshëm dhe parashikohet që autokolonat e pelegrinazhit të vazhdojnë të kalojnë kufirin për katër ditë.
Ministria tha se 6.600 palestinezë, 4.092 nga Bregu Perëndimor dhe 2.508 nga Gaza, pritet të shkojnë në tokat e shenjta për Haxh këtë vit.
Ministri Palestinez i Vakëfeve dhe Çështjeve Fetare, Hatem al-Bekri, në një deklaratë për media kishte thënë se janë marrë të gjitha masat që haxhilerët të niseshin nga Aeroporti Ndërkombëtar i Kajros në Aeroportin e Mbretit Abdulaziz në Xhide dhe prej aty në qytetin e Mekës.
