Organizata e Kombeve të Bashkuara (OKB) paralajmëroi për kushtet “vdekjeprurëse” të jetesës në Gazën veriore dhe tha se palestinezët “po vdesin nga uria ndërkohë që bota po shikon”, raporton Anadolu.
“Gjatë një muaji të kaluar, Gaza veriore ka qenë nën një rrethim thuajse brutal”, tha zëdhënësi i OKB-së Stephane Dujarric gjatë një konference për shtyp, duke përcjellë mesazhin e Nënsekretares së Përgjithshme për Çështjet Humanitare, Joyce Msuya.
“Operacionet tokësore ushtarake izraelite i kanë lënë palestinezët pa gjërat thelbësore për të mbijetuar, i kanë detyruar ata të ikin disa herë për siguri dhe kanë ndërprerë rrugët e tyre të arratisjes dhe furnizimit”, thuhet në mesazhin e Msuyas.
Duke vënë në dukje se “kushtet e jetesës janë vdekjeprurëse” në Gazën veriore, ajo ka theksuar se “civilët po vdesin nga uria ndërsa bota po e shikon”.
“Këto mizori duhet të ndalen”, ka deklaruar Msuya.
Dujarric tha se 1.000 shtëpi palestineze janë shkatërruar në Bregun Perëndimor dhe Kudsin Lindor të pushtuar këtë vit.
Shkatërrimi ka zhvendosur më shumë se 1.100 njerëz, me 40 për qind nga Kudsi Lindor.
