Me 45 viktimat e fundit në 24 orët e fundit, Pakistani gati ka arritur shifrën e zymtë prej 1.000 viktimash në aksidentet e shkaktuara nga shirat e rrëmbyeshëm dhe përmbytjet në të gjithë vendin që nga mesi i qershorit, transmeton Anadolu Agency (AA).
45 persona të tjerë kanë humbur jetën dhe dhjetëra janë zhdukur në 24 orët e fundit pasi reshjet musonike dhe ujërat e rrëmbyeshme vazhduan të godasin vendin, njoftuan zyrtarët dhe mediat lokale.
Me gjysmën e vendit të Azisë Jugore nën ujë, qeveria njoftoi një dislokim të plotë të ushtrisë në të katër provincat dhe rajonin verior Gilgit-Baltistan për të mbështetur administratën civile, e cila po përpiqet të përballet me përmasat e paprecedentë të katastrofës, njoftoi televizioni shtetëror pakistanez.
%2FAA-28733741.jpg)
Përmbytjet e fundit të shkaktuara nga shirat e pandërprerë kanë zhvendosur mijëra njerëz në provincën veriperëndimore Khyber Pakhtunkhwa, jugperëndimore Balochistan dhe provincën jugore Sindh, duke shtuar numrin tashmë në rritje të viktimave.
Shumica e viktimave janë raportuar në Khyber Pakhtunkhwa, e ndjekur nga Sindh dhe Balochistan, duke e çuar numrin e përgjithshëm në 982 që nga 14 qershori, sipas Autoritetit Kombëtar të Menaxhimit të Fatkeqësive (NDMA).
Megjithatë, në një konferencë për shtyp në Islamabad, ministrja e Informacionit Marriyum Aurangzeb deklaroi se numri i viktimave është mbi 1.000.
%2FAA-28733746.jpg)
Reshjet e vazhdueshme musonike, të kombinuara me përmbytjet masive, kanë lënë 30 milionë pakistanezë pa strehë, me dhjetëra mijëra të zhvendosur. Miliona njerëz në zonat e goditura nga përmbytjet janë pa energji elektrike dhe gaz.
Ujërat e furishëm nga lumi Kabul kanë përmbytur rrethet Noshehra, Charsaddah dhe Madan në Khyber Pakhtunkhwa, ku qeveria i ka kthyer shkollat dhe ndërtesat qeveritare në kampe strehimi për mijëra njerëz të zhvendosur, raportoi transmetuesi lokal Geo News.
Përmbytjet masive kanë rrënuar qindra shtëpi, restorante, ura, madje edhe disa hotele shumëkatëshe të vendosura në brigjet e lumit Swat në luginën piktoreske Swat, një nga atraksionet më të preferuara turistike. Të paktën 16 persona kanë humbur jetën në aksidente të lidhura me shirat në luginë gjatë 24 orëve të fundit, tha NDMA.
%2FAA-28733743.jpg)
Vërshime kanë ndodhur edhe në lumenjtë Indus dhe Gilgit, të cilat mund të përmbytin më shumë toka.
Për shkak të përmbytjeve të mëdha në lumin Indus, administrata ka urdhëruar evakuimin e disa zonave të ulëta në rrethet Dera Ghazi Khan dhe Rajanpur të provincës verilindore Punjab.
Gjashtë diga të tjera kanë shpërthyer brigjet e tyre në pjesë të ndryshme të Balochistan-it, duke zhytur dhjetëra fshatra dhe toka bujqësore.
Kalimi kufitar Chaman në jugperëndim midis Pakistanit dhe Afganistanit ka mbetur i mbyllur për shkak të shirave të dendur dhe përmbytjeve.
Shirat njëjavore që tashmë kanë shkatërruar pjesën më të madhe të infrastrukturës dhe bujqësisë në provincën normalisht të thatë, kanë marrë fund në rrethet lindore, duke sjellë lehtësim për dhjetëra mijëra njerëz të izoluar.