– E natyrshme është ta shohësh anijen mbi ujë, mirëpo nga rreziku është ta shohësh ujin në anije. Pra, bëhu ti në zemrën e dynjasë dhe mos lejo që dynjaja të banojë në zemrën tënde.
– Nëse humb diçka që nuk ke shpresuar që do ta humbësh, Allahu do të të furnizojë me diçka, që ti nuk e ke paramenduar se do ta posedosh.
– Ji optimist kur gjërat të vështirësohen, se Allahu është betuar dy herë se pas vështirësisë do të vijë lehtësimi, dhe me të vërtetë, pas vështirësisë do të vijë lehtësimi.
– Jeta e pyeti vdekjen: “Pse njerëzit më duan kurse ty të urrejnë?”
Vdekja u përgjigj: “Sepse ti je një gënjeshtër e bukur, kurse unë jam një realitet i hidhur.”
– Nuk e dimë se çfarë do të na fusë në Xhenet, pas mëshirës së Allahut. A është një rekat, apo një sexhde, një lëmoshë, dhënia ujë ndokujt, ndonjë nevojë që ia ke kryer vëllait tënd mysliman, lutja apo përmendja e Allahut. Prandaj, puno dhe mos i nënvlerëso gjërat.
– Vendos pak nga ndjenjat në mendjen tënde derisa të zbutet dhe vendos pak nga mendja jote në zemrën tënde derisa të përqendrohet. Më pëlqejnë zemrat që e pranojnë dhimbjen me heshtje dhe i shfajësojnë gabimet e të tjerëve me qëllim të mirë.
– Kur e ke bindjen se pas pikëllimit vjen lumturia dhe pas lotëve të tu vjen buzëqeshja, vetëm se e ke realizuar një adhurim madhështor, e ai është mendimi i mirë për Allahun.
– Nëse të lodhin dhembjet e dynjasë mos u mërzit, ndoshta Allahu është përmalluar për ta dëgjuar zërin tënd kur ti i lutesh Atij. Mos e prit lumturinë derisa nuk buzëqeshesh, por buzëqeshu derisa të jesh i lumtur.
Nga arabishtja: Irfan JAHIU